दिल्ली ते काश्मीर थेट रेल्वेसेवेचं स्वप्न साकार
जम्मू-कश्मीरसाठी ऐतिहासिक पाऊल उचलत भारत सरकारने जम्मूमध्ये नवीन रेल्वे विभाग स्थापन करण्याचा निर्णय घेतला आहे. यामुळे दिल्लीहून काश्मीरपर्यंत थेट रेल्वेसेवा साकारण्याचे स्वप्न आता प्रत्यक्षात उतरणार आहे. पंतप्रधान नरेंद्र मोदी ६ जानेवारी रोजी वर्च्युअल पद्धतीने विभागीय रेल्वे व्यवस्थापक (डीआरएम) कार्यालयाचे उद्घाटन करणार आहेत.
रेल्वे संचालन होणार अधिक प्रभावी
हा निर्णय जम्मू-कश्मीर, हिमाचल प्रदेश आणि पंजाबमधील पठाणकोटसारख्या भागांसाठी क्रांतिकारक ठरणार आहे. सध्या या भागांचा रेल्वे संचालनासाठी फिरोजपूर विभागावर अवलंब आहे, पण नवीन विभागामुळे जम्मूमधूनच संचालनाची जबाबदारी पार पाडली जाईल. यामुळे रेल्वे सेवांचा कार्यभार अधिक प्रभावी होईल, प्रवाशांचा वेळ वाचेल आणि रेल्वेसेवेचा दर्जाही उंचावेल.
जम्मूमधूनच होणार सर्व व्यवस्थापन
नवीन रेल्वे विभागामुळे जम्मूवासीयांना मोठा दिलासा मिळणार आहे. पठाणकोट ते श्रीनगर बारामुल्ला, बटाला-पठाणकोट आणि पठाणकोट-जोगिंद्रनगर या मार्गांसह इतर महत्त्वाच्या रेल्वेमार्गांचं व्यवस्थापन जम्मूमधूनच होईल. रेल्वे संचालनाशी संबंधित निर्णय आता थेट जम्मूमधून घेतले जातील, यामुळे स्थानिक प्रशासन आणि प्रवाशांना वेगवान सेवा मिळेल.
पर्यटनाला मिळणार नवा आयाम
चेंबर ऑफ कॉमर्स अँड इंडस्ट्रीचे अध्यक्ष अरुण गुप्ता यांनी सांगितलं की, “जम्मूमध्ये रेल्वे विभाग स्थापन झाल्यामुळे येथील पर्यटनाला प्रचंड चालना मिळेल. कटरा आणि जम्मूमधील संपर्क अधिक मजबूत होईल. भविष्यात मोनोरेलसारख्या सेवाही सुरू होण्याची शक्यता आहे, ज्यामुळे कटऱ्याहून जम्मूमध्ये सहज प्रवास करता येईल.”
विकासाचा नवा अध्याय सुरू होणार
नवीन रेल्वे विभागामुळे जम्मूमधील पायाभूत सुविधांचा विकास होईल. यामुळे रोजगाराच्या संधी निर्माण होतील, तसेच जम्मू ते अखनूर आणि पूंछपर्यंत रेल्वेसेवा विस्तारण्याचा मार्ग मोकळा होईल. हा प्रकल्प जम्मूवासीयांसाठी केवळ एक सुविधा नसून विकासाचा नवा अध्याय ठरणार आहे.
जम्मूवासीयांसाठी अभिमानाचा क्षण
पंतप्रधान मोदी आणि रेल्वे मंत्रालयाच्या निर्णयामुळे जम्मूवासीयांना दीर्घकाळापासूनची मागणी पूर्ण होताना पाहायला मिळतेय. हा निर्णय स्थानिक विकासाला नवी दिशा देईल. “हे ऐतिहासिक पाऊल उचलल्याबद्दल आम्ही पंतप्रधान नरेंद्र मोदी यांचे आभार मानतो,” असे अरुण गुप्ता यांनी सांगितले.
६ जानेवारी हा दिवस जम्मूच्या इतिहासात सुवर्णाक्षरांनी लिहिला जाईल, कारण हा प्रकल्प जम्मू आणि काश्मीरसाठी विकासाच्या नव्या युगाची सुरुवात ठरणार आहे.
#swatantryanews#marathinews#maharashtra#.