पंतप्रधान नरेंद्र मोदी यांनी ‘मन की बात’ कार्यक्रमात सांगितले की, यंदा महिला दिनाच्या निमित्ताने त्यांच्या सोशल मीडिया अकाउंट्सची जबाबदारी महिलांना देण्यात येणार आहे. आज, रविवारी, ‘मन की बात’च्या ११९व्या भागात बोलताना त्यांनी देशासाठी सर्वस्व अर्पण करणाऱ्या महिलांना आठवले.
महिलांच्या योगदानाचा उल्लेख करताना मोदी म्हणाले:
महिलांच्या योगदानाविषयी बोलताना पंतप्रधान मोदी म्हणाले, “हंसा मेहता यांनी आपल्या राष्ट्रीय ध्वजाच्या निर्मितीपासून ते त्यासाठी बलिदान देणाऱ्या देशभरातील महिलांचे योगदान अधोरेखित केले होते. त्यांचे मत होते की, आपल्या तिरंग्यातील केशरी रंगातून ही भावना प्रकर्षाने व्यक्त होते. त्यांनी विश्वास व्यक्त केला होता की, आपली नारी शक्ती भारताला सक्षम आणि समृद्ध करण्यासाठी मोलाचा वाटा उचलणार – आणि आज त्यांच्या शब्दांना सत्यता लाभली आहे. तुम्ही कोणत्याही क्षेत्राकडे पाहिले, तरी तुम्हाला महिलांचे भरीव योगदान दिसेल.”
पंतप्रधान मोदी देशातील काही प्रेरणादायी महिलांना एक दिवसासाठी आपले सोशल मीडिया अकाउंट्स सोपवणार
यानंतर, पंतप्रधान मोदींनी एका अनोख्या उपक्रमाची घोषणा केली. ते म्हणाले, “यंदा महिला दिनी मी एक विशेष उपक्रम हाती घेत आहे, जो आपल्या नारी शक्तीला समर्पित असेल. या विशेष प्रसंगी, मी माझे सोशल मीडिया अकाउंट्स – जसे की एक्स (माजी ट्विटर), इन्स्टाग्राम – देशातील काही प्रेरणादायी महिलांना एका दिवसासाठी सोपवणार आहे.
या महिला त्या आहेत, ज्यांनी विविध क्षेत्रांत मोठी यशस्वी कामगिरी केली आहे, नावीन्यपूर्ण प्रयोग केले आहेत, आणि आपली स्वतंत्र ओळख निर्माण केली आहे. ८ मार्च रोजी, त्या त्यांच्या कार्याचा आणि अनुभवांचा प्रवास देशवासीयांसोबत शेअर करतील.”
महिला दिनानिमित्त महिलांना जागतिक व्यासपीठ मिळणार
पंतप्रधान पुढे म्हणाले, “प्लॅटफॉर्म माझा असेल, पण तिथे त्यांचे अनुभव, त्यांची आव्हाने आणि त्यांच्या यशोगाथा असतील. जर तुम्हाला असे वाटत असेल की हा सुवर्णसंधी तुम्ही मिळवावी, तर ‘नमो ॲप’मध्ये तयार केलेल्या विशेष फोरमद्वारे या उपक्रमात सहभागी व्हा. माझ्या एक्स आणि इन्स्टाग्राम अकाउंट्सच्या माध्यमातून तुमचा आवाज संपूर्ण जगभर पोहोचवा. चला, यंदा महिला दिनी आपण सर्वजण एकत्र येऊन अदम्य नारी शक्तीचा सन्मान आणि उत्सव साजरा करूया.”
#swatantryanews#marathinews#maharashtra#