महाराष्ट्राने राष्ट्रीय पंचायत पुरस्कार 2024 मध्ये सहा पुरस्कार मिळवून दुसरा क्रमांक मिळवला आहे. ओडिशा आणि त्रिपुरा राज्यांनी प्रत्येकी सात पुरस्कारांसह संयुक्तपणे पहिला क्रमांक मिळवला. आंध्र प्रदेशने चार पुरस्कारांसह तिसरे स्थान पटकावले, तर बिहार आणि हिमाचल प्रदेशने प्रत्येकी तीन पुरस्कार मिळवले.
राष्ट्रीय पंचायत पुरस्कार केंद्रीय ग्रामीण विकास व पंचायती राज विभागाच्या वतीने दारिद्र्य निर्मूलन, आरोग्य, बालकल्याण, जलसंधारण, स्वच्छता, पायाभूत सुविधा, सामाजिक न्याय, प्रशासन आणि महिला सक्षमीकरण या निकषांवर पंचायतींच्या कार्याचा पुरस्कार करण्यासाठी दिला जातो.
विज्ञान भवनात झालेल्या कार्यक्रमात राष्ट्रपती द्रौपदी मुर्मू यांच्या हस्ते पुरस्कार वितरण करण्यात आले. या कार्यक्रमाला केंद्रीय पंचायती राज मंत्री राजीव रंजन सिंह, राज्यमंत्री प्रो. एस.पी. बघेल, सचिव विवेक भारद्वाज आणि इतर अधिकारी उपस्थित होते.
राष्ट्रपतींनी या पुरस्कारांच्या माध्यमातून इतर पंचायतींना सर्वोत्तम पद्धतींचा अवलंब करण्यास आणि ग्रामीण भारताच्या सर्वांगीण विकासासाठी प्रेरित होण्याची आशा व्यक्त केली.
पुरस्कार प्राप्त ग्रामपंचायतींमध्ये महाराष्ट्राची कामगिरी:
मान्याचीवाडी ग्रामपंचायत (सातारा): नानाजी देशमुख सर्वोत्तम पंचायत सतत विकास पुरस्कार आणि ग्राम ऊर्जा स्वराज्य विशेष पंचायत पुरस्कार या दोन श्रेणीत प्रथम पुरस्कार प्राप्त.
मोडाळे ग्रामपंचायत (नाशिक): स्वच्छ व हरित पंचायत श्रेणीत तृतीय पुरस्कार.
बेळा ग्रामपंचायत (भंडारा): कार्बन न्यूट्रल श्रेणीत प्रथम पुरस्कार.
तिरोरा पंचायत समिती (गोंदिया): नानाजी देशमुख सर्वोत्तम पंचायत सतत विकास पुरस्कार श्रेणीतील सर्वोत्तम ब्लॉक पंचायत श्रेणीत तृतीय पुरस्कार.
यशदा अकादमी (पुणे): पंचायत क्षमतानिर्माण सर्वोत्तम संस्थान श्रेणीत तृतीय पुरस्कार.
या कार्यक्रमात विजेत्या पंचायतांना डिजिटल स्वरूपात पुरस्काराची रक्कम प्रदान करण्यात आली. उदाहरणार्थ, मान्याचीवाडी ग्रामपंचायतला 2.5 कोटी रुपये, बेळा ग्रामपंचायतीला 1 कोटी रुपये, आणि मोडाळे ग्रामपंचायतीला 50 लाख रुपये मिळाले.
कार्यक्रमात एक माहितीपट देखील सादर करण्यात आला, ज्यामध्ये काही पंचायतांच्या उत्कृष्ट कार्याचा परिचय देण्यात आला.
स्वातंत्र्य न्यूज , नाशिक– न्यायासाठी लढणारी स्वातंत्र्याची बातमी!
#swatantryanews#marathinews#maharashtra#